Afrikaans /

Sport en Ontspanning

JukskeiklubErens gedurende 2005 het 'n groep vriende om 'n braai die gedagte uitgespreek om 'n jukskeiklub in Kranspoort te begin. Die gedagte is vinnig aanvaar en is daar met groot ywer twee grondbane by die ou Pub & Grill uitgelê.Marie Kruger is die enigste van die 12 ou stigterslede wat nog hier woon. Mettertyd het die klub uitgebrei en is besluit om te bane nader te skuif en die terrein te vergroot.

2006 - Stigterslede van Kranspoort Jukskei Laer


2006 - Jukskei oefening op die ou baan


In 2011 is met baie sweet en bloed drie bane by die piekniek terrein voltooi. In die afgelope twee jaar is deur middel van pannekoek verkope, ope-dae, skenkings en lede wat hulle hand in eie sak gesteek het, 'n pragtige toegeruste klubhuis met ablusie, spreiligte, braai area en 'n vierde baan aangebring. Alhoewel klein, kan met trots gesê word Kranspoort se bane word onder die bestes in die land gereken.aanvanklik het die klub net uit sosiale spelers bestaan en het ligaspelers vir Middelburg klub gaan speel. Klublede het jaarliks in April aan die Seniorburger-toernooi in Kroonstad begin deelneem of vir die winterprogramme na Tshipise  of die eiland "verhuis". Tientalle medaljes en trofeë is reeds verower. Ons klub het nou bykans 40 aktiewe lede en daat is vanjaar besluit om, ten spyte van die Covid-terugslag, as volwaardig klub by Mpumalanga Jukskeifederasie en Jukskei-SA(JSA) met 'n eie geregistreerde embleem en pragtige kleure en klere te affilieer.Na die eerste reeks liga wedstryde gedurende Oktober loop Kranspoort se "oumense" los voor op die punteleer.Ons is trots op julle!

Hester Fourie gooi 'n pen

Kransblaar Gymnasium se dames werk hard 

Vroegoggend net voor agt, kom ‘n klompie dames by die Raas-blaarsaal bymekaar. Voor die saal parkeer die motors. Dames in veelkleurige oefenkleure, oefenmatjies opgerol onder die arm en met ‘n breë glimlag op die gesigte, stap die saal binne en neem posisie in.
Ritmiese musiek speel kloppend deur die saal en die aktiwiteite begin. Vandag is Pilatus-oefendag, wat beteken die kern-, maag- en beenspiere gaan weer hard werk.
Elke Dinsdag en Donderdagoggend oefen hierdie groepie dames onder die bekwame leiding van Ansie van Rensburg. Joga is ook in hulle weeklikse program ingesluit, wat op sy beurt weer ander spiere laat werk wat normaalweg min oefening kry. Dit stimuleer die bloedsomloop, en asemhaling. Callanetics is herhalende klein bewegings wat die spiere teen die skelet en beenstelsel oefen.

Oefengroep demonstreer 'n paar oefeninge

Visvang

Die idee het ontstaan toe Gerhard Potgieter nog geleef het. Hy en Hannes het klein krokkodille in ons dam gaan loslaat. Daar word toe ‘n plek skoongemaak en sand afgelaai vir krokkodille om in die son te bak. Eers was dit nie toegelaat om te hengel nie. Later is dit aan Hannes toegesê om die plek te ontwikkel. ‘n 200m Strook is aangewys. Kibboets het die braai gebou. Houtkiste vol drank is opgeveil ten bate van ontwikkeling. ‘n Gedeelte daarvan is gebruik om die toilet daar naby te bou en in te rig.
Verdere ontwikkeling is deur lede en met hul bydraes gedoen. Verskeie vissoorte kan gevang word bv. Karp, Bass,ens.
Besienswaardighede: Met tye seekoeie, verskeie voëlsoorte en water-skilpaaie. Voorwaar kos vir die siel.